Sausage Platter Breakfast: McDonald's

Binili ko ito para sa anak ko nang minsang umalis ako na hindi siya kasama.  Binili ko ito nang walang inumin, at nagkakahalaga ito ng 80 piso.  Yung french fries ay nakuha ko nang libre dahil sa isang kupon.  Yung ganitong itlog ng "McDo" sa kanilang mga almusal ay walang lasa para sa akin.  Pero yung sausage nila sa almusal nila, gusto ko talaga.  Paborito ko nga yung kanilang Big Breakfast, yung muffin ang kasama at strawberry jam.

Colgate Featuring Spongebob

Mayroon kaming kamag-anak na nagbigay sa amin nitong toothpaste na ito, maraming piraso.  Maliit lamang ito, at sa wari ko ay nabibili nila ito sa Estados Unidos nang maramihan.  Sabi nga nila parang dito lang sa Pilipinas nakakabili ng tingi, dahil halos sa lahat ng ibang lugar ay binibili nila ang mga kailangan nila sa grocery nang bulto at maramihan kasi sa ganoong paraan lang nila nabibili ang mga bilihin.  Samantalang dito sa Pilipinas, nakakabili na ng tingi, may mga sari-sari store pa na mas pinaliliit pa ang sadyang naka-tingi na.  Itong toothpaste na ito ay gustong gusto ng anak kong 4-na-taong-gulang.  Tsaka talagang ginawa ito para sa bata at hindi maanghang.  Bubble Fruit ang tawag nila sa flavor nito.

Summer Vanillas Body Lotion by Bath & Body Works

Maraming iba pang variety ang Summer Vanillas ng Bath & Body Works pero nakuha ko itong Coconut.  Hindi gusto ng asawa ko ang amoy nito.  Kabaligtaran naman ako.  Noon hindi ko rin gusto ang amoy (at lasa) ng niyog, pero ngayon ay nag-mature na siguro ako at ayos na ito sa akin.  Kapag ginagamit ko ito ay talagang nangangamoy ang buong kwarto at sa mga nadadaanan ko ay naiiwan ang amoy nito.  Minsan akala ng mga nakakaamoy na nagpabango ako.  Parang amoy summer o tag-init nga ito, kung kailan masarap mag-outing sa mga languyan, mapa-beach pa yan o swimming pool.

Secret Wonderland by Bath & Body Works

Natanggap ko lang ito galing sa isang kamag-anak na naka-base na sa Estados Unidos.  Rich ito at hindi malabnaw, pero hindi gaanong kaaya-aya ang amoy para sa akin, pero ayos lang.  Gusto ko lang din maitala na minsan sa buhay ko ay nagkaroon ako nito at para maikwento sa mga susunod na henerasyon.  Nakakatuwa rin na gumagawa na sila ng mga disenyo sa kanilang mga bote o lalagyan.

Enfant Baby Soap

Napansin ko sa balat ng anak ko na kapag isang klaseng sabon lang ang ginagamit niya sa mahabang panahon ay parang natutuyo at na-a-allergy ang balat ng anak ko.  Nang sinubukan kong paiba-ibahin ang sabong ginagamit niya, naging mas malusog ang nga ang balat niya.

Ito ang isang pinang-alternate ko na sabon niya.  Ang bili namin dito ay 39.75 piso.  Ayos naman, banayad ang amoy at talagang madulas kapag isinasabon sa balat - yung para bang may "moisturizer" kaya napapanatag ako na hindi matutuyo nang husto ang balat ng anak ko.

Low Fat Strawberry Milk: Pure and Best

Mga 27 piso ang bili namin dito.  Ayos naman, di gaanong matamis tsaka hindi masyadong "maanggo."  Yung ibang lasa/flavor nito ay nasubukan din namin.

Grilled Pork Tenders Breakfast Meal: Jollibee

Ngayon ko lang nakita na ginawa ito ng Jollibee para sa kanilang almusal.  Ito ang kinuha ko para masubukan.  Masarap naman, para akong kumakain ng tapsilog (o parang mas malapit sa tocilog kasi manamis-namis yung timpla nila ng Grilled Pork Tenders).  Ang presyo nito ay 89 piso na may kasama nang inumin.  Panalo ito nang kinain ko kasama ang kape, para sa akin kapag ganito ang almusal ko ay magiging maganda ang buong araw ko.

Chicken Sausage Pancake: Jollibee

Dati hindi ko maisip na pwede palang sabayan ng ulam ang pancake.  Para sa akin, panalo itong ginawang ito ng Jollibee.  Kinuha namin ito para sa 4-na-taong-gulang naming anak, at nagustuhan niya!  Talagang pinagsasabay niya sa loob ng bibig niya ang "hotdog" (yun yung tawag niya dito sa Chicken Sausage na ito, pero parang sa lahat ng parang medyo kamukha ng hotdog ay hotdog na nga ang itinatawag niya) at yung pancake na pinahiran ng "cream" (para kasing butter-flavored cream ang ibinibigay ng Jollibee para dito) at maple syrup.  Ang bili namin dito ay 65 piso na may kasama nang inumin.

Breakfast Steak: Jollibee

Iyan ang tawag nila sa kanilang Burger Steak na sinama sa sinangag at pritong itlog.  Ang halaga nito ay 69 piso na may kasamang inumin (pwedeng mamili kung kape, juice, o softdrinks).  Ang asawa ko ang nag-order nito kaya hindi ko masyadong nanamnam kung bagay nga ba itong kombinasyong ito.  Para kasing ang hirap isipin na gusto kong mag-ketchup sa pritong itlog pero may gravy din sa sinangag.  Sa susunod ay ito ang kukunin ko.

Plain Bagel: Country Style

Nitong huling 3 taon ko lang nalaman na ang bagel pala ang parang pandesal ng mga Amerikano sa Amerika.  Dati ko nang nakikita ang bagel sa Country Style pero hindi ko ito pinapansin.  Pero nito ngang nalaman kong bagel pala ang parang pandesal ng mga Amerikano, nagpabili ako nito sa asawa ko para malaman ko kung ano pakiramdam na mag-almusal ng ganito sa halip na pandesal.  Nakabili siya pagkatapos ng alas-7 ng gabi kung kailan binabawasan nila ang presyo.  Pinabili ko yung walang palaman, at nabili niya ito sa halagang 40 piso.  Sanay ako na malambot ang pandesal, pero ito palang bagel ay bahagyang mas makunat o mas matigas kaysa pandesal.  Pero di gaya ng pandesal, wala itong hangin o parang di ito gaanong maalsa, kaya mas "solid" ang kagat.  Pinainit ko naman ito sa aming oven toaster, pero siguro iba pa rin ang lambot nito kung mainit-init pa itong galing sa tindahan.

Sizzling Sisig: Simple Treats

Ito naman ang kinuha ng asawa ko, ang kanilang Sizzling Sisig.  Nasa ilalim ito ng kategoryang Appetizers sa menu nila, na karaniwang nangangahulugang "pulutan" sa kulturang kainan sa labas ng mga Pilipino sa Pilipinas.  Kaya naman nag-order pa ng extra rice ang asawa ko para maging tanghalian niya ito (sa halip na pulutan, kasi hindi naman kami pumunta doon para uminom).  Masarap at malinamnam talaga ito pero talagang langoy din sa mantika.  Hindi rin ako gaanong natuwa sa dami (o unti) ng lagay nila.

Beef Tapa Filipino Breakfast: Simple Treats

Ito naman ang kinuha ko para sa 4-na-taong-gulang naming anak.  Kung tutuusin, tapsilog lang naman talaga ito.  Napili ko ito kasi gusto lagi ng anak ko na kanin ang kinakain niya.  Tinikman ko ito at nasarapan naman ako, manamis-namis ang timpla ng tapa.  Nasarapan din naman ang anak ko kahit sinangag ang kanin (kadalasan sa mga bata ay hindi gusto ang sinangag).  Ang halaga nito ay 120 piso na may kasamang inumin (pwedeng pumili kung kape o orange juice).

Chicken Pesto Pasta: Simple Treats

Inabot na naman kami ng gutom sa daan at sa pagsisikap namin na maiba tuwing kakain sa labas, nadaanan namin itong Simple Treats sa San Pablo City, Laguna.  Mahilig ako sa pesto at nakita ko agad sa menu nila itong Chicken Pesto Pasta kaya't ito agad ang kinuha ko.  Medyo nainip lang kami sa tagal ng pagdating ng pagkain, tapos meron pa kaming kasamang 4-na-taong-gulang na anak na triple ang ikli ng pasensya kumpara sa aming mag-asawa pagdating sa paghihintay.  Nasabi ko tuloy (nung hindi pa dumadating ang mga kinuha namin) na baka hindi na kami maulit dito.  Pero masarap naman itong na-order kong ito.  Pang-isang tao lang ang dami nito, at 135 piso ang presyo nito.

Manager's Choice: Shakey's

Hindi na namin pinapalitan ang klase ng pizza na kasama sa kinuha naming "family meal."  Nanghinayang kaming mag-asawa kasi ito nga naman ang best pizza nila, bakit pa namin papalitan.  Yung dalawang bata na kasama namin, pinatanggal ang baka, sibuyas, at bell pepper nang kumain sila.  Ham na lang ang natirang topping.  Kahit manipis ang crust, ang sarap pa rin talaga nito.

Carbonara Platter: Shakey's

Sa kinuha naming "family meal," pinapalitan namin ang Spaghetti Platter ng kanilang Carbonara Platter.  Masarap naman pero karaniwan na ang lasa nito (ibig kong sabihin ay halos ganito din ang lasa ng ibang carbonara na nabibili).

Mukha namang marami ang nakalagay pero parang eksakto lang sa amin ang pagkain sa "meal" na ito.  Sabi sa menu ay pang-5 hanggang 6 na katao ito at kapag sinabing "person" ay akala ko mga pangkaraniwang "adult" (mga edad 13 pataas).  Ang grupo namin ay kaming mag-asawa at tatlong batang edad 4 hanggang 8.  Kaya nang kinuha namin ito ay kampante ako at naiisip ko pang baka may sobra.  Pero wala, ubos lahat!  Ni hindi nga ako naka-isang basong inumin (iced tea).  Kaya natutunan ko sa karanasan naming ito na kaya din ng mga bata na kumain ng singdami ng sa nakatatanda lalo na kapag mga "pambata" ang pagkain (gaya ng pritong manok, spaghetti, at pizza).

Maligayang Araw ng mga Puso!

Chick n' Chips: Shakey's

Ito yung isa sa mga kasama sa "family meal" na kinuha namin - limang pirasong pinirito na mga piyesa ng manok at Mojo Potatoes.  Maalat pa rin ang timpla, gaya nung una akong makatikim nito lampas 10 taon na ang nakakaraan.  Kapag nalulunok ko ang maalat na balat ng manok o yung Mojo nila ay parang nararamdaman kong nagrereklamo ang pantog ko (sa isip ko kasi habang nilulunok ko ang alat ay magkakasakit ako sa bato).  Bakit nga ba hindi nila binawasan ang alat nito?  Pero bakit din ang sarap kainin kahit ganito ito kaalat?

Iced Tea Pitcher: Shakey's

Pumunta kami sa Shakey's isang hapon.  Ang kinuha namin ay isa sa kanilang "Family Meals."  Nakalimutan ko na ang eksaktong pangalan ng kumbinasyon na iyon pero ang mga kasama ay isang pitsel o 1 pitcher ng kanilang Iced Tea, isang large na Manager's Choice Pizza (pwede raw palitan ng ibang flavor na mapipili ng panauhin), Chik n' Chips o yung limang piraso ng iba-ibang pyesa ng pritong manok at Mojo Potatoes, at Spaghetti Platter o isang bandehado ng spaghetti.  Ang halaga nito ay 985 piso at nakalagay doon sa kanilang menu na ito ay pang-5 hanggang anim na tao.  Mahigit isang libong piso din ang pinagbayaran namin dahil meron silang service charge.

Melliwel in Pangil

Narinig ng isang kamag-anak namin sa Radyo Veritas ang tungkol sa Melliwel Carbo Vegetalis na isang gamot na herbal o gawa sa mga natural na halaman.  Narinig niya na may pwesto sila ng panggagamot sa Pangil, Laguna.  Pumunta kami at nang magtanong-tanong kami doon para malaman ang daan patungo sa "bundok" na gusto naming puntahan ay walang nakakaalam kung nasaan ito.  Kinutuban lang kami doon sa isang makipot na daan na paakyat sa tabi ng highway.  Pumasok kami at itinuloy-tuloy ang pag-akyat.  Habang daan ay may nakikita kaming mga taong nakaputi na nagtitiyaga talagang maglakad paakyat.  Hindi kami tumigil hangga't may nakikita kaming mga taong naglalakad, at sa may halos tuktok na nga ay sa wakas nakita namin na mayroon ngang pinatunguhan ang mataas na inakyat namin.

Heto nga at kinuhanan ko ng larawan ang tanawin mula sa itaas na ito ng Pangil.  Nakilala namin dito si Dra. Mel na siyang nagsaliksik at nagsagawa ng Melliwel Carbo Vegetalis.

Kamay ni Hesus

Ilang beses na kaming nakapunta dito pero di pa rin kami nakakaakyat hanggang sa pinakataas.  Hanggang sa may unang set ng mga rebulto pa lang, o sa may paanan ng hagdanang paakyat sa malaking rebulto ni Hesus.  Ngayon ay hindi na naman kami makaakyat dahil umuulan at kulang ang aming payong.  Maya-maya ay nagutom kami (kahihintay tumila ang ulan) at naisip naming lumabas para sumubo kahit kaunti.  Maraming tindahan at karinderya sa labas, at lagi ring merong pansit habhab!  Sampung piso ang isang order nito, naka-dalawang order ang asawa ko!  Ayos lang, bente lang ang pansit niya.  Dito lang talaga ako sa Lucban, Quezon nakakakain ng pansit na ito.  Ibang-iba talaga siya sa mga pansit na madalas kong nakakain (bihon, canton, malabon, palabok, miki).  Mas manipis ito sa miki at parang "starchy" ang texture pag kinagat at nginuya.  Yung timpla nila dito, masabaw o may kaunting sarsa.  Tapos bagay talaga taktakan ng suka.  Masarap talagang maranasan.  Naghabhab (kinain ng hindi ginagamitan ng kubyertos) din ako nito noong una akong nakasubok nito, pero ngayon ay nagtinidor na ako :D

Ham and Hotdog for Dinner

Madalas ay ang asawa ko ang nagluluto ng mga kakainin namin, pero ngayong hapunan ay kailangang ako ang magluto dahil wala siya (naiba ang oras ng pagpasok sa trabaho).  Bukod sa ito lang ang pwede kong maluto nang mabilisan, ito lang din ang maluluto ko na siguradong makakain namin ng anak ko.  Madalas pang-almusal ito, pero ngayon ay ulam namin itong pang-hapunan.  Ayos lang dahil Pinoy naman tayo eh :D

Pure & Best Whole Milk

Dati na kaming nakabili ng produkto ng tatak na ito.  Nabanggit ko doon na nabilib ako na ito ay produkto ng Pilipinas.

Di ko na maalala pero parang humigit kumulang 30 piso ang bili namin dito.  Malinamnam siya!  Halos kalasa ito ng sariwang gatas na nabibili namin noon sa UPLB-DTRI (University of the Philippines Los Baños - Dairy Training and Research Institute).

BBQ Shredder: KFC

Ito naman ang kinuha ko, ang KFC BBQ Shredder.  Ito na ata ang pinakabago nilang produkto, at tumatatak din ang patalastas nito sa akin, kasi si "Wilson" ng "Be Careful With My Heart" ang artista dito.  Nakalimutan ko lang kung karneng baboy o karneng manok nga ba ito (himay na ito na nakapalaman), pero masarap siya kasi talab na talab yung manamis-namis na sarsa nito.  Nalalasa din ang usok, na dapat talaga ay taglay niya dahil nga BBQ o barbecue - ibig sabihin, inihaw.  May gulay din ito na nakakapagdagdag ng refreshing na lasa, tapos may taco chips na nagbibigay naman ng lutong sa kagat.  Ang bili namin dito ay 85 piso na may kasamang inumin at fries.

Pizza Twister: KFC

Na-curious o nakalimutan na ng asawa ko kung ano nga ba ang lasa nung Twister ng KFC.  Ang nakapaskil pa doon ay Pizza Twister, kaya't lalo pa kaming na-curious.  Dati nang may  Twister pero matagal-tagal na kaming hindi nakakain nito.

Napapalitan ang side dish na kasama sa set o meal ng Pizza Twister na ito.  Pinili ng asawa ko ay Coleslaw.  May kasama ding inumin ang meal na ito, at 115 piso ang presyo ng buong meal na iyan.

Parang pumayat o lumiit din ito kumpara sa huling kinain kong ganito ilang taon na ang nakalilipas.  Pero masarap pa rin naman ang lasa nung manok na palaman nito.  Lasang pizza nga!  May pepperoni pang nakaipit din sa loob.

Jolly Hotdog: Jollibee

May nakita akong mga coupon ng Jollibee sa bahay namin dahil daw ito ay kanilang 35th Anniversary Promo.  Tiningnan ko ang mga kondisyon nito at nakita kong hanggang a-28 ng Pebrero lamang ito.  Medyo matamlay at walang ganang kumain ang 4-na-taong-gulang kong anak kaya gusto namin siyang pakainin sa labas sa pag-asang sumigla siya at makakain ng marami-rami.  Tamang-tama ang pagkakaroon ng mga coupon na ito.

Kinuha ko itong Jolly Hotdog sa promo na nagkakahalaga ng 55 piso na may kasamang inumin.  Medyo matagal na akong hindi nakakita at nakakain nito, at natuwa ako sa bagong pagkakabalot nito.  Para kasing compact ito at madaling dalhin.  Pagbukas ko ng kahon, medyo nagulat ako na parang ang liit ng tinapay.  Sa totoo lang nalito ako kung yung tinapay nga ba ang lumiit o yung hotdog.  Pero masarap pa rin siya, halos ganun pa rin ang lasa gaya noong una itong lumabas noong dekada 90.

King's Special Almuchow: Chowking

Ito naman ang inorder ko: King's Special Almuchow.  Nung una, ito talaga ang in-order ng asawa ko, tapos sa isip ko yung Chicken Loganiza Almuchow ang kukunin ko.  Habang nasa pila ako, sabi ng asawa ko palitan ko na lang daw yung order niya ng Chicken Loganiza Almuchow.  Hangga't maaari ay pinag-i-iba-iba ko ang mga kinukuha naming putahe kapag kumakain kami sa labas para marami kaming matikman, kaya iniba ko rin ang order ko at ginawa kong King's Special Almuchow.  Nang inihain ito ay nakiusap agad ng 4-na-taong-gulang kong anak na sa kanya na lang daw itong pagkain na ito.  Sa paningin lang, ang gusto niya dito sa plato kong ito ay yung tapa.  Gusto niya talaga kasi nung binigyan ko siya nito, humingi pa siya uli ng humingi.  Kasama rin sa platong ito ay isang Chicken Longaniza at piniritong itlog.  Ang halaga nito ay 109 piso at may kasamang inumin.  Ang pinili kong inumin kasama nito ay kape.  Hmmm...sarap ng ganitong almusal!

Chicken Loganiza Almuchow: Chowking

Ito naman ang napili ng asawa ko - Chicken Loganiza Almuchow.  Tinikman ko ito at masarap naman, pero parang may mas masarap pa na chicken longganisa kaysa dito, di ko lang matukoy at maalala ngayon.  Ang order na ito ay 69 piso sa Chowking at may kasamang inumin.  Hindi ako sigurado kung baka medyo mahina ang panglasa ko ngayon dahil medyo nagbabara ang ilong ko dahil sa lamig ng panahon, pero parang medyo natatabangan ako sa dilaw na kanin nilang ito (Chinese fried rice ata ang tawag nila dito).

Sweet and Sour Pork: Chowking

Parang biglang na-miss ng asawa ko ang Almuchow ng Chowking kaya dito kami nagpunta para kumain ng almusal.  Pero sa mga larawan, sabi ng anak kong 4-na-taong-gulang, ang gusto niya ay yung may "cookies."  Napaisip ako sandali kasi di ko maisip na magkakaroon ng cookies ang mga kanin at ulam ng Chowking.  Ang tinutukoy niya pala ay yung mga prawn crackers.  Ang pinili ko para sa kanya doon sa mga larawan na may prawn crackers ay itong Sweet and Sour Pork.  Naaalala ko na noon pa man ay masarap ang ulam nilang ito.  Ngayong mas matanda na ako - ibig sabihin mas detalyado na ang pagtukoy ko sa mga pagtikim o panglasa - napagtanto ko na mas lamang ang tamis nito kaysa asim.  Ang order na ito ay nagkakahalagang 90 piso na may kasamang softdrinks.  Nagdagdag kami ng 4 na piso para maging pineapple juice ang inumin nito.

Saging na Pula

Ngayon lang ata ako nakakita nito sa personal ng saging na pula.  Nung nakita ko ito, pakiramdam ko mas masarap ito kaysa dilaw na saging.  Nang matikman ko, lasa siyang dilaw na saging pero yung texture at ligat nito ay parang sa saging na saba.  Mukhang bihira lang ang ganitong saging dahil hindi pa ata ako nakakita nito sa mga pamilihan.